هل فكرت قبل كذا كيف الناس اللي تقابلك لأول مرة تتذكرك؟

بالذات لو ماراح تشوفك مره ثانية يعني هذه المرة الأولى و الأخيرة !

تخيل معي السيناريو التالي دخلت بيت صديق لك وأنت تعرف فقط صاحب البيت و أغلب الناس تقابلهم لأول مرة و بديت تحاول أنك تتعرف على الناس و تعرّف بنفسك وبدأو يتكلمو في موضوع لما جيت تشارك رأيك فيه كان قوي وعنيف شوي لأنك شايف أنه من حقك تقول رأيك بصراحة و كل شخص له حرية التعبير عن آراءه..

انتهى اليوم و أنت رجعت بيتك وفي الأغلب مافي أحد اخذ رقمك أو حب أنه يكوّن علاقة معاك بسبب رأيك اللي ممكن ضايق بعض الموجودين بالذات لو كلهم يعرفوا بعض و أنت الشخص الغريب بينهم..

و في الأغلب برضو أنك ماراح تشوف هذول الأشخاص مره ثانية لكن كل مره راح ينذكر اسمك فيها أمامهم ماراح يتذكروك بشكل لطيف ولا راح يفضلوا أنهم يشوفوك ثاني.. هي هذه الحقيقة للأسف بغض النظر هل كلامك حقيقي أو صحيح.

لأن الموقف القوي أو العدائي أو المعاكس ماراح يكون لطيف للناس اللي تقابلهم لأول مرة.. فهل قد فكرت كيف وقع الكلمات اللي تقولها لما تقابل ناس لأول مرة؟

خلينا نتفق أنه في طريقين لا ثالث لهم. الأول أنك تقول شي لطيف و تكون شخص سهل لتصنع انطباع أولي ممتاز و حتى وإن كان رأيك في موضوع معين مختلف الطريقة لها دور قوي في انك توصل وجهة نظرك بكل سلاسة و بدون ماتكون مشحونة و الأهم أنك بعد ماتوصّل وجهة نظرك دائماً تأكد أن الاختلاف شي طبيعي و أنك أبداً لاتقلل من وجهة نظر الأطراف الأخرى وهذا كفيل بأن يجعل اختلافك في الرأي محل تقدير مو عداوة. أما الطريق الثاني فهو مثل المثال اللي ذكرناه تكون الشخص اللي ماحد يحب يشوفك ثاني أو عل أقل ماراح يتذكرك بصورة حلوة.

وإذا فكرت أنك تكون ساكت طول الوقت في المناسبات اللي فيها ناس تقابلها لأول مرة فهنا للأسف ماحد راح يتذكرك لا بالخير ولا بالشر وتعتبر ضيعت فرصة قوية للتعرف على الناس و بناء علاقات مثمرة للمستقبل!

دائماً تذكر كل مره تقابل شخص جديد أن هذه فرصة ذهبية أنك تكوّن علاقات ذهبية و مثرية و الأهم أن كل ما الناس تتذكرك تقول: شخص لطيف الله يذكره بالخير.