فكّر في آخر مره شعرت فيها بالخذلان أو الحزن أو الغضب, هذه المشاعر لما نعيشها تولّد أحاسيس ومشاعر مختلفة وممكن بكل بساطة تهز ثقتك بنفسك اللي قعدت فترة طويلة تبنيها.

ما أصعب هذه النقطة الكفيلة أنها تغير حالتك من شخص يعرف إيش يبغى وكيف يوصل لأهدافه إلى شخص يبدأ يشكك في قراراته و أهدافه وللأسف هذه الحالة ممكن تمتد لمدة طويلة ماتعرف نهايتها على حسب الظرف اللي تمر فيه أو صعوبة المشاعر اللي تعيشها. 

طيب كيف أعرف أنها مجرد فترة عابرة وحرجع من نفس المكان اللي وقفت عنده! أو هل ثقتي بنفسي ماراح ترجع و حبدأ من الصفر؟

الجواب هنا يعتمد على عوامل كثيرة لكن خلينا نبدأ فيها بالتدرج عشان نوصل لفهم بسيط لعملية إعادة بناء الثقة أو على الأقل استيعاب هذه الفترة الصعبة.

أولاً: المشاعر اللي تعيشها اليوم طبعاً لها تأثير على ثقتك بنفسك. اليوم اللي تكون فيه سعيد و كل أمور حياتك مستقرة مو مثل اليوم اللي يكون عندك فيه مشكلة كبيرة هذا الضغط يخليك تبدأ تشكك في ذاتك وهل ثقتك بنفسك حقيقية؟ وهذا طبيعي جداً و مهم جداً أننا نكون واعيين و متقبلين هذه النقطة لأن إنكار حالة الضعف للأسف ماراح يخلينا أحسن ممكن تصعب علينا الموقف و مانعرف نتصرف أكثر.

ثانياً: بعد ما نكون صادقين مع أنفسنا في نقطة مهمة جداً في الأغلب نغفل عنها وهي أننا نرحم أنفسنا! كيف تتعاطف مع نفسك في أصعب مراحل حياتك أو في دوامة المشاعر الصعبة اللي تعيشها هذا الشيء راح يهّون عليك كثير من إحساس التوهان وانخفاض الثقة اللي تعيشه ويخلي الأيام الصعبة تعدّي. قد إيش سهل أننا نكون موجودين للناس اللي حولنا في أيامهم الصعبة ولكن في أيامنا الصعبة ننسى أن نتعامل مع أنفسنا بهذه الطريقة ونحن أحق الناس بهذه المعاملة! رفقاً بنفسك!

ثالثاً: بعد ما تنقضي هذه الفترة وتبدأ ترجع للحياة الطبيعية (لأن الحياة ما تفضل على حال واحد) راح يرجع إتزان مشاعرك نوعاً ما وهنا يبدأ التقييم الحقيقي! وين كنت ووين صرت! في مؤشر الثقة بالنفس هل رجعت لنفس النقطة أو قلّة وانهزت بعد هذه المرحلة! والأهم أنك ماتخلي هذا التقييم يزعلك بالعكس الصراحة في التقييم راح تساعدك ترجع أفضل من الأول وتتعلم من مواقف الحياة عشان لما تمر بظرف صعب ثاني (ولأن هذه طبيعة الحياة لاتدوم على حال واحد) تعرف كيف تتعامل مع هذه المشاعر.

رابعاً: وأخيراً رجعت بعد ما كنت صريح مع نفسك وحددت مواطن الضعف عندك و فين موقعك الحقيقي في مؤشر الثقة تيجي الخطوة المهمة أنك تشتغل على كل مواطن الضعف هذه وتشوف إيش التدريب اللي مفروض تلتزم فيه لترفع ثقتك بنفسك أو إيش الإجراء المناسب سواء كان على خطوات أو خطوة واحدة. و بالتأكيد هذه الخطوة هي الجوهرية واللي راح تخلي ثقتك بنفسك ترجع لأنك إذا شفت المشكلة شي جيد ولكن إذا ما اشتغلت عليها ماراح يكون في فائدة حقيقية من هذا التقييم.

وآخر نقطة حابة أضيفها وأركز عليها: تعاطف مع نفسك لأنك أحق الناس بهذا التعاطف.